Namhlanje kade kuwusuku olukhulu eNewcastle njengoba ihhovisi lezokuxhumana libize izintatheli ngenhloso yokwethula izimoto ezizokwenza ukusebenza komkhandlu kubelula. Lapha kubalwa amaveni, imigqomo kadoti( skip bins ) kanye neloli elisebenza ukugibela ezindaweni eziphezulu (cherry picker).
IMeya yase Newcastle uCllr Xolani David Dube itshele amaKhansela nabasebenzi ukuthi banethemba ukuthi lezimoto zizokwenza umsebenzi ubelula ikakhulukazi ukuletha izidingo emphakathini njengoba behlale bethola izingcingo. Uphinde wanxusa nokuthi ziphathwe kahle zingabonakali zezenza ezinye izinto phansi kwezihlahla. Ukuvezile kodwa ukuthi lezimoto bazosebenzisa ama tracker ukuqapha ukusebenza kwazo kanti nodizili bazokwazi ukubheka ukuthi wenza umsebenzi womkhandlu hhayi ukungcebeleka.
UMasipala uveze ukuthi zithengiwe lezimoto nokuzikongela umkhandlu imali kwazise beyinkulu imali yokurenta ebiphuma zonke izinyanga, umasipala phambilini bewukhikha R29 000 ukuboleka imoto ngayinye kanti bakholwa ukuthi manje bazokwazi ukonga . Lezimoto zibe sezidluliselwa kulabo abaphethe ezokuthutha badonswa ngendlebe ukuthi baqinisekise ukunakekela kwazo.
UCllr Dube ubuye waveza ukuthi okwamanje abakwazi ukusho ukuthi umkhandlu ukhiphe malini ngalezimoto ngoba kusazoza ezinye ezithengiwe nokuyilapho bayobe sebehlanganisa izindleko basho ukuthi kubize malini.
