Zivumelene ngazwi linye izikhulumi ekade zise Madadeni Community Hall namhlanje njengoba kade kuwusuku lwesifo sofuba emhlabeni jikelele nobeluhlelwe isibhedlela sase Madadeni. Izikhulumi zicule ingoma eyodwa kwelokuthi kubalulekile ukuhlolela isifo sofuba ukuze uzazi ukuthi umephi nalesifo esiphenduka ingozi mangabe singalashwa.
uMntwana uCllr Thengi Zulu owu Somlomo womkhandlu wase Newcastle wendlalele inkulumo ka Mntwana uNhlanganiso izinyane leSilo ngokukhuthaza amadoda ukuthi ahlolele isifo sofuba kanye nezinye izifo. Enkulumeni yakhe uthe “Kuyajabhisa ukuthi namhlanje kugcwele omama la amadoda awabonwa njengoba abantu beshoda kodwa ukube sithe kuzobe kutholwe o-Ice Tropez no Savanna bekuzogcwala phama.”
Ube esededela uMntwana uNhlanganiso Zulu oxoxe udaba lwakhe lokulwa unesifo sofuba okwamthatha izinyanga eziyi-9 nokwagcina kuholele ekutheni agcine eselekelwa umshini ukuze aphefumule. Uphinde waqinisekisa ukuthi amaphilisi asesibhedlela ayafana alikho elingcono ngoba kuthiwa elabantwana ngakho abantu kumele bawadle baze bawaqede amaphilisi. UMntwana uNhlanganiso oyinxusa le TB ugeqe amagula ngalesifo waze waveza nokuthi samshiya enephaphu elilodwa kodwa kuyaphileka emva kwalesifo njengoba yena esehlale iminyaka engaphezu kweshumi kusukela alashwa.
Uphinde wahlaba kakhulu labo abaphuza imishanguzo baphinde babheme notshwala, ekhuza uthe “Mangabe unalesifo kubalulekile ukuma otshwaleni nakugwayi ugxile empilweni yakho lezo izinyanga eziyisithupha ukuze amaphilisi asebenze ngoba kunganjelo uzosala enkundleni. Uphinde wakhala kakhulu ngabantu ababhema ugwayi esidlangaleni njengoba begulisa kakhulu abantu abangabhemi. Ube esecheza ukuthi yena wayengabhemi kodwa waguliswa abantu ababhema isinomikanjani njengoba esenephaphu elilodwa.
Uphinde wakhuthaza amadoda ukuthi anakekele abesifazane nawo akhuthalele ukuyohlolwa izifo hhayi ukulinda omama bahlole bese ejabulela imiphumela mayingenalo igciwane.
