Kudutshulwe kwalinyazwa unogada namhlanje ngenkathi izigebengu zizama ukubamba inkunzi imoto yemali eDube Village Mall, eNanda.
Inkampani yakwa RUSA ibike ukuthi unogada udubuleke emlenzeni wase opha kakhulu ngemva kwalesigameko esishaqisayo. Ngokombiko kufike amadoda amahlanu abekade ehlome eyizingovolo ase ejikela ngemva kwemoto yemali nokuyilapho abe eseqala edubula izikhawu eziningi. Unogada udubuleke emlenzeni kodwa ukwazile ukubaleka abuyele ngaphakathi emotweni ethwala imali kanti izigebengu zihambe zilengise izandla njengoba zigcine zingayitholanga imali.
Kubikwa ukuthi ezinye izinhlamvu zishaye emnyango wesitolo sokudla esiseduze nalapho kade kubanjwa khona imoto yemali. Unogada obelimele uphuthunyiswe esibhedlela ngokushesha ukuze athole usizo ngemva kokudubuleka.
