Usekude ukukhohlwa akubonile izolo mhlaka 09 December uGogo Sbongile Jiyane ohlala Flathela, Osizweni kulandela ukuthi iNyatee Foundation okuyinhlangano engenzi nzuzo imnike isikhiye zendlu yakhe entsha sha, kulomsebenzi iNyatee bekade ibambisene ne CPF yas’ Osizweni.
Echaza udaba luka Gogo uZiningi Kunene oyilunga le CPF uthe bahlangana Gogo Sbongile Jiyane emgaqweni ehamba ngezinyawo isimo sakhe sisibi njengoba nendawo ehlala kuyona yayidabukisa ehleli nabazukulu. Kwathi mabebona lesimo bakhuluma no Kennel Nkosi ophethe isiteshi samaphoyisa Osizweni wase eludlulisele ku Mphathi wakhe uMajor General Alexander nokuyilapho baqala ukucela ama donations kwaze kwafika iNyatee Foundation esize ngokwakhela ugogo.
Umphathi(CEO) weNyatee Foundation uveze ukuthi wakhala izinsuku ezintathu ngemva kokubona isimo ugogo aphila ngaphansi kwakhe wase ehamba eyonxusa ku Mnumzane Teddy Nyathi ongu Msunguli walenhlangano ukuba lomuzi wakhelwe umuzi ngokushesha, eqhubeka udalule ukuthi wayengathembi ukuthi indlu yophela esaphila ugogo ngenxa yokugula nosizi olwalumkhungethe. Umndeni wakwa Jiyane uphinde wafakelwa amathangi amanzi egcekeni, indlu yawo ifakwe impahla okubalwa kuyo imibhede, microwave, kitchen scheme, grocery nokunye okunikelwe yizinhlangano zakulesi sifundazwe.
Omakhelwane bagogo bona banikwe ama food parcel nokuyilapho kukhethwe khona imindeni engu 150 ehlomulile izolo. Okubonakele yinjabulo ebigcwele emphakathini wase Flathela kanti bebelokhu bebongile kwi Nyatee Foundation ngokubambisana okuhle ekushintsheni mpilo yesalukazi.
